انت موظف اعرف حقوقك

يوم سعيد ...
الحل الوحيد إنو اليوم دا ..وكل يوم يكون سعيد ..هو إنك تمشي الشغل مبسوط ...وترجع مبسوط ..

وأسباب السعاة في الشغل محدودة للأسف .. لأنه شغل ما ملاهي ! فالضغط والجدية وحساب التصرفات بالورقة والقلم جزء أساسي من شكل اليوم ،بس السعادة هنا مقصود بيها راحة البال والاطمئنان للموظف وللعمل ،  واستمرارية الحماس لانك تمشي الشغل كل يوم ...

ولتحقيق النوع دا من السعادة محتاجين نحقق حاجة مهمة ياخ..الحقوق ..الحقوووووق البترموها في الدرج مع أقساط العربية وتقفلوا عليها وتتذكروها مرة واحدة  في الشهر !


 حقوقك كموظف هي السبب الأساسي اللي "مفروض " يخليك تلتزم بدوام  أو تنجز شغل ،فا ما  عشان تدفع مصاريف المدارس وتجيب بيت وتسافر ،تقوم تخلي انسان عادي زيك كدا ياكل حقوقك سواء بقصد أو بدون قصد !!

حقوق الموظف الأساسية في العمل  واضحة وما محتاجة درس عصر ، الموظف والمدير مفروض يكونوا عارفنها وراثيا، بس حنفترض إنو في ناس غابت عنهم ونذكر تاني :

#حق الخصوصية :
يعني  يكون عندك مساحة خاصة ، تقدر تنجز فيها شغلك بتركيز ،تفكر بعمق وهكذا.
طبعا  الثقافة السودانية  الحالية بتفترض إنو الخصوصية يعني مساحة لممارسة طقوس الفطور المقدس ،الغفوة، القطيعة بالتلفون مع الزملاء ،والصلاة ..عشان عادي ناخد مرتبات من غير شغل لكن ما عادي نفوت الصلاة !!
المهم في الأمر إنو الخصوصية جزء مهم من راحة الموظف السوداني ومساحة ضرورية تساعده إنه يؤدي وظيفته بكفائة أكبر ، ومن واجبات الموظِّف توفيرها ليهو، وإذا ما عندو امكانية أو ميزانية مفروض صاحب (العمل )دا يمد موظفينه على حسب ميزانيته ، حتى لو بدأ صغير و"حقّاني" في الأخر حيكبر بسبب حقانيته دي.

#حق المساواة :
أهلا بكم في كوكب التفرقة العنصرية العرقية العُمْرية المتجندرة اللولبية ..
كثير من المدراء وأصحاب العمل للأسف ما بيراعوا للحقوث البديهية للموظف و بيفرقوا بينهم حسب المزاج ، ويقبل الموظف كل هذا بصدر رحب عشان المرتب في أخر كل شهر !!
النقطة دي فعليا ما محتاجة شرح أو تبرير .. انت كموظف لمن تقبل وضع زي دا لنفسك ، ما تلومهم لو هم كمان قبلوهوا ليك!


#حق التعويض المتساوي:
بمعنى إنه لو إنت شغال ليك سنين وبتاخد 2000 في الشهر ، وفي موظف انضم للفريق مؤخرا لنفس وظيفتك، وما عندو خبرتك ولا كفائتك ،بس هو ولد عمو صاحب المدير ،والدولار زاد وانت عارف ،فا مرتبوا أعلى منك ؟!؟!؟!؟
معليش تعال على نفسك شوية وخد مشوار لغاية مكتب المدير وقول ليهو بكل هدوء واحترافية: يا مرتبي يزيد ،يا حتفقدوني وتخسروا مهاراتي كشركة .. والبينا عامرة .
وقس على ذلك حقك في التدريب ،الاجازات ،السفر (إن وجد) والتأمينات بشكل عام .
لمن تكون احترافي في طلب حقوقك  حتاخدها كاملة ، لانه الاحترافية دليل على انك عارف حقوقك كويس وعارف انك ما محتاج لاساليب ملتوية أو صوت عالي عشان تاخدها؟ ، ودا لوحده كفيل إنه يثبت المتعدي عليك عند حده ويعمل ليك ألف حساب.

ما تخلي حد ياخد حقك منك .. مهما كان الحد دا ذكي و حنّاك ، أو طويل وبيطير وبيطلع أرانب من طاقيتو !!
 حقك دا مكلِّف بالنسبة لصاحب العمل فمن المؤكد إنه حيتفاداهو قدر الامكان ،بس لو لقى إنك عارف حقوقك أكيد ما جيجازف لانه القانون في صفك .
خليك حريف!
ولو طلع مديرك وحد من القلة اللولبية طوالي سيبو وتعال فتش عن وظيفة جديدة  و حمل سيرتك الذاتية عشان المدراء و اصحاب الشركات يلقوك بسهولة اكبر من خلال زر ( حمل سيرتك الذاتية ) موجود في كل صفحات الموقع .
شاركونا كمان آرائكم و مقترحاتكم لمواضيع حابين نتكلم ليكم فيها مع الخبراء في التعليقات :) ..

بالتوفيق للجميع