يوم في حياة مندوبة مبيعات

استضفنا للموضوع دا شخصية مخضرمة في المجال .. مرت بتجارب عظيمة وعلمت نفسها بنفسها .. اشتغلت في المبيعات زمن المندوب بيتنقل من باب لي باب بين العملاء .. عرفت صغائر وكبائر سر المهنة ..وشرفتنا في مبنى الإذاعة  عشان تورينا تفاصيل التفاصيل في يوم من حياة مندوب المبيعات ...

استاذة /أماني صلاح ، المدير العام لوكيل أوريفليم السودان .

#استاذة أماني احكي لينا عن رحلتك في المشوار ..بديتي وين ووصلتي هنا كيف ؟

دراستي كانت بعيدة تماما عن مجال المبيعات .. حيث درست اللغات واتبحرت في الأدب وأسراره ،لكن دخلت المجال من أجل تجربة شي جديد ولأني من زمان مغامرة بطبعي وبحب التجديد والتعلم عن طريق التجربة ، والحمدلله لقيت نفسي بارعة في الموضوع وحبيتو جدا .

اكتشفت خلال المغامرة دي  انو المبيعات كمهنة محتاجة صفات معينة عشان الواحد يبدع فيها ..أهمهم الصبر ،الذكاء الاجتماعي ، اللطف في التعامل ، الجسارة وحب المخاطرة ، الشغف والإيمان الشديد بالمهنة ،والأهم هو المثابرة وعدم اليأس ، لانه الوظيفة دي تحديدا معتمدة تماما على العميل ،وضعه ،اهتمامه بالمنتج والخدمة ،ومزاجه في اليوم داك ..فا مهنة مندوب المبيعات بتلاقي صعوبات كتيرة ومختلفة خلال اليوم ، من غير صبر وعزيمة ممكن الواحد يلاقي نفسه محبط وغير راغب في العمل .

#حاليا انتي من موقعك الوظيفي أكيد بتلاقي أنواع مختلفة من المندوبات الراغبات في العمل ، شنو الصعوبات البتواجههم هنا في السودان ، بالذات انو الوظيفة معتمدة على العمل الخارجي أو (الحوامة) :

طبعا أهم معضلة بتلاقي المندوبات هي إنو الوقت ما بيكفي مع بعد المسافات بين العميل والتاني،  والدخل بيعتمد على تغطية أكبر عدد من العملاء في أقل وقت،  ودي الحاجة اللي دايما بشدد عليها مع الجميع سواء كانو مندوبات أو حتى عملاء قرروا يعملوا كمندوبين في أوقات فراغهم :" ابذل ذكاءا وليس مجهودا ".. ما ضروري تمشي لكل عميل في بيتو اذا ممكن توصل ليهم المعلومة وانت في بيتك .. عصرنا دا سهل عملية نقل المعلومات بصورة عظيمة ووفر الوقت على الجميع ، استفيد من التكنولوجيا عشان تطوع ظروفك لصالحك وتكسب زمن أكتر .

كمثال ،وسائل التواصل الاجتماعي و البيع الالكتروني و موقع السوق واحد من اكبر المواقع الرائدة في المجال ده حالياً

الجيل دا محظوظ جدا بالتقنيات دي .. احنا تقنيتنا المتوفرة كان اسمها (door to door ) ,يعني حرفيا بنتنقل من باب لي باب لاتمام عملية البيع والمتابعة ،دا غير المواصلات والمشي والانتظار في الصفوف في بعض الاحيان .. يعني الجيل الجديد دا مفروض يكون كلو شغال في هذا المجال من سهولته .

#نصيحة لمندوبي المبيعات البسمعونا حاليا :

تنظيم الوقت هو أهم عامل من عوامل نجاح مهمة مندوب المبيعات ، ما تضغط على الزبون ، خليك ذكي في التعامل مع جميع أنواع العملاء بإنك تدرس كل عميل وتقراهو من أول لحظة ، أبدا يومك بفكرة إيجابية عشان يومك كلو يكون إيجابي ، تابع مع العميل دايما وحافظ على علاقتك بيهو في المناسبات الرسمية ،"دلعو " واديهو احساس انه عميلك الوحيد ، لانه اللطف  والاهتمام من القوى الخفية في الكون ،بتخلي العميل يفضلك عن غيرك فقط بسبب لطفك واهتمامك دا،   وأبدا ما تيأس مهما صعبت مهمتك ..لانه الصبر معلم بالنسبة ليك ، بيقويك ويسهل عليك شغلك مع الزمن، ويميزك عن غيرك وهو القارب اللي حيوصلك لبر الامان ".

دي تجربة استاذة /أماني صلاح من ما كانت مجرد مندوب مبيعات لحد ما اصبحت المدير العام لوكيل أوريفليم السودان .

ما تنسوا الفرصة قدامكم حسي مفتوحه نزلوا السيرة الذاتية حقتكم في الموقع عشان اصحاب الشركات يشوفوها .. التكنلوجيا بين ايديكم استغلوها..

و اذا عندك قصة ملهمة ممكن تحفذ بيها اقرانك يا ريت تشاركنا بيها في التعليقات ..