استضفنا في حلقة اللية من البرنامج ضيف مميز جدا .. بنى نفسو بنفسو..اتعلم كل شي لاقاهو حتى لو ما مهتم بيهو ..ووصل مراحل ممتازة جدا من ريادة الأعمال بمجهودو الشخصي ..

 أستاذ /أمين جعفر مدير شركة رمانة صاحبة وكالة شركة  تويوتا في السودان .

أمين اختصر رحلة كفاحه في نقاط :

#أنا قريت طب بشري 5 سنين ..واشتغلت في شركة خلال فترة الدراسة عشان أتعلم وأجرب شي مختلف ..وأول ما اتخرجت اشتغلت في ادارة الأعمال الصغيرة ..فيها النجاح وفيها الفشل ..بس الفشل كان أهم من النجاح لأنه علمني الطرق الصحيحة والخاطئة في ادارة الأعمال .

#أي فرصة عمل جاتني ما قلت ليها لأ .. حتى لو كنت ما بعرفا كنت بسأل وبقرا عنها كتب (إن توفر) ..

#الكورسات المجانية أون لاين كثيرة جدا .. يعني مافي مبرر إني ما اتعلم وآخد شهادات .

#السفر للعمل برة كان خطوة كبيرة جدا بس مهمة..لانه السوق في الخارج فيهو منافسة عالية جدا..لو قدرت تتغلب عليها وتنجح فيها ما بيغلبك شي تاني ..

كمية المرات اللي قررت فيها ما امشي الشغل كتيرة شديد ..لكن المرات اللي ذكرت نفسي فيها إنو دا امتحان وانا لازم أنجح فيهو ..كانت أكتر .

#الحمدلله أسست شركة خاصة مبنية على أسس خبراتي السابقة وأخطائي الكثيرة ..والحمدلله .

نصيحة يا أمين ؟

●الفشل أحسن أستاذ ..استفيد منو بدل ما تحبط نفسك بيهو

●ممكن تقرا حاجة وتشتغل في حاجة تانية ..الجامعة ما نهاية الحياة العلمية ..

● ما تستنى رضا أو موافقة المحيط على قراراتك ... دي حياتك انت

● أي فرصة لوظيفة تجيك أدرسها كويس قبل ما تدخل فيها .. ولو قبلتها ،حاول تستفيد منها قدر الامكان عشان دي فرصة تعليمية فعليا ما بتتكرر

● أقبل التحدي حتى لو مخيف ...
النضج ما بيحصل إلا خارج دائرة الراحة .

● أبدأبمشاريع صغيرة عشان الخسائر تكون بسيطة ..وأدخل في المشروع وانت متوقع كل شي .. جرب كم مجال لغاية ما تلقى أكتر شي قريب لقلبك وبيسعدك .. ولوفشلت جرب تاني .. واعتبر الفات كان كورس ليك

● واخيرا رضا الله مهم بالنسبة ليك ..اتوكل عليهو واعمل العليك ..

اذا كنت صاحب تجربة مميزة زي تجربة أستاذ /أمين جعفر يا ريت تحكي لينا تجربتك واذا انت ناوي تبدأ السكة حقت ريادة الاعمال كمان ورينا نفسك تحقق شنو و ليه اخترت السكة دي 

بالتوفيق للجميع