بتتأخر على الشغل أصلا عادي

الناس البتتأخر على شغلها ومواعيدها ولقاءاتها مع الأهل و الأصحاب .. إنتو أحسن نوووع !

يلا الناس ديل ميزاتهم أكتر من عيوبهم .. كدي أقعدوا عشان أحكي ليكم الميزات دي وتأخيرهم سببوا شنو .

حتتأخروا كان قعدتوا ؟؟ ماااالو التأخير دا الميزة زاااااتا أقعدوا ساي   

الناس اللي بتتأخر عن الشغل والمواعيد بصورة عامة عندهم مشكلة تقدير للزمن .. بمعنى ، اللي بالنسبة ليك 10 دقايق هم بكونوا حاسين انو 20 دقيقة ..

يلا هم بس احساس الزمن عندهم مختلف وحقيقي جدا بالنسبة ليهم ، ما اهمال ولا كسل لا قدر الله ، ولا غتاتة عشان "المرتب بيتأخر أنا كمان أتأخر" ،لا لا بالعكس أبسلوتلي    الناس دي طباعهم في العادة بتكون حلوة جدا ولطاف بصورة مفاجئة ..

أنّحكي ليكم عن صفاتهم   

#المتأخرين و التفاؤل :

الناس دي من كتر التفاؤل، بيطلع الصباح ماشي على شغلو قبل ساعة من موعد الدوام ،  وبيتهيئ ليه إنو الساعة دي بتكفي انو يغسل العربية ، ويشرب شاي عند أميرة،  ويشتري مقاضي البيت من الدكان ويوديها البيت ..بعد داك يشوف المكتب دا بي وين   

 بس التفاؤل دا واحد من أسباب النجاح في الشغل ، لانه الطاقة الإيجابية دي بتجذب ناحيته النجاح بإثباتات علمية ودينية كمان (تفائلوا بالخير تجدوه) .

# المتأخر المتفائل المتحمس :

التفاؤل بيجيب حماس ..والحماس عمود من أعمدة النجاح ، لأنه حماس يعني مثابرة واهتمام وبذل الجهد عشان الشغل ينجح والمدير يفرح والخزنة تملى والمدام في البيت تلبس دهب ..وكدا يعني  

المتأخر المتفائل المتحمس  الحبوب  اللزوز    :

ياخي ناس حلوين حلاة   عفوية كيف ، و ذكاء إجتماعي كيف ، وروح عالية تقول يا ليييل     

عشان كدا الناس دي بتنجح وبتعبر بمزاج .. ناس لزوزة بشكل   

المتأخر الكرييتيف حد الثمالة :

يلا البيقول لي كيف كرييتيف بقول ليهو ببساطة :

التفاؤل والعفوية مقترن تماما براحة البال والروقان ..يعني مافي ستريس في الحياة ..ومافي ضغوطات عمل ممكن تسيطر على كيفية أداءهم للعمل ..

اضافة لإنه الناس دي مع عدم احساسهم بالزمن ،لمن يركزوا في عمل ما، بيسرحوا فيه شديد وبشتغلوهوا بضمير ..فالنتيجة انو بيأدوا العمل بإتقان ..بيتأخروا للأبد أيوة،  لكن بيدوك شغل (ندجيف )   

يااا معشر المتأخربن ..أي نعم إنتو ناس مميزين (تنين،تنين السنين)  

 لكن مهم جدا الإلتزام بالزمن ..بالذات لمن يكون زمن ناس قاعد يروح مع زمنكم .. من مبدأ (احترامك لزمن الأخرين من إحترامك لنفسك).

التأخير وعدم الاحساس بالزمن هو عادة سايكولوجية سهل  جدا كسرها وتعديلها ، ودي خطوات مبدئية بس فعاااالة أسمعوا مني أنا القصيرة دي:

● وضع الأولويات :

فترة الصباح ممكن تقعد تفطر بمزاج قدام التلفزيون وترد على رسايل الوتساب والإيميل مافي مشكلة ..

بس الأولوية هنا إنك تلبس وتطلع من البيت بدري عشان توصل المكتب في الوقت المناسب ..والتلفزيون والوتساب ملحوقين

حدد أولوياتك عشان تترتب حياتك

1

وظيفة مصمم جرافك –مسؤول سوشيال ميديا (سينير)

0 SDG

بحري كافوري

تصميم - جرافيك

Enas Mohmmed Adam Yassin

1

أبحث عن عمل نقاشة كهرباء بياض - تعاقد / شروع

0 SDG

شرق النيل القادسية

وظائف أخري

إسراء شريف

1

مطلوب سكرتيرة وموظف موارد بشرية

0 SDG

الخرطوم المعمورة

جودة

GS Company

سجل كل يوم لمدة أسبوع ، الزمن اللي بتحتاجو لكل شيء مهم بتعملوا من الصباح للمساء.

وحاول تقسم اليوم عليهم بصورة منظمة بحيث انك ما تتأخر على أي مهمة فيهم..

كتابة المواعيد وتقسيم اليوم ممكن يظهر ليك كا خطوة غير مهمة ،لكن في الحقيقة المعلومة الزمنية الخاطئة في الدماغ بتبدأ تتعدل من اللحظة اللي تعترف فيها بأنك محتاج تنظم زمنك وتبدأ تقسيم يومك .. أسمعوا مني أنا القصيييييرة دي  

● خلي بيتك زي بيت الساعاتي :

أملى البيت ساعات ..محل ما عينك بتقع كتير خلي في المكان ساعة أو منبه ... برمج دماغك أنو الوقت وراك وراك ، مع الزمن دماغك حيتولى المهمة وحينتبه للزمن حتى وانت ما منتبه .. اللعبة دي حلوة شديد 

# خطة "نص ضربة" :

نص اليوم الأول بيتضمن دوامك ، مدارس الأولاد ،اجرائات رسمية وغيروا ..فا عشان ما نضغط عليك كا إنسان رائع ومتأخر أممي ، نظم النص الأول من يومك بس ..والباقي دي أسرح فيهو ..أطلع فيهو ..تمو خيال ..اللي يريحك  احنا ما ناس متطلبين يعني  

وأخيرا ..التاخير الغير مقصود هو محور حديثي الليلة عشان الناس ما تسرح ، وبالنسبة للناس الخايفة تفقد كل الميزات البتجي مع التأخير دا ..فأحب أطمنكم ..تنظيم الوقت ما بيلغي التفاؤل والاجتماعية والحماس والكرييتيفيتي والمقدرة على الطيران ....بالعكككس ابسلوتليييي .. لو الوقت اتنظم ومعاه الصفات المذكورة أعلاه دي ،يادااب الحتتولد لديكم مقدرة التخفي والرؤية في الظلام

ماتنسوا تسيبوا تعليق توروني فبهو إذا الخطوات دي نفعت معاكم ولا لأ .. عشان كان ما نافعة أنا زاااتي أشوف غيرها  

أها طيب ..فتكم عافية