اظهار المشاعر في العمل كارثة!

الناس في العادة ما بتقدر تخبي مشاعرها في العمل ..بالتحديد السالبة منها.. وبالذاااات أنا دي!!

اتخيل تكون شغال في مشروع لفترة طويلة ويتلغي .. أو يجي زميل أو عميل ويتكلم معاك باسلوب ما حبابو .. أو يحصل شي محزن يخلي الدموع عشرة عشرة ..في كل المواقف دي أكيد حتكون مستفز ، زعلان  ،أو عيونك موعودة بالورم  بهذا الترتيب ..

كل المشاعر دي في خطر من اظهارها للعيان (الزملاء الأشرار) في مكان العمل لانها بتأثر على شغلك ..وعلى مقدرتك على التعامل مع المحيطين بصورة لطيفة، وأكيد بتهز صورتك اللي انت قاعد سنين ترسمها في عقل المدير أو الموظفين من مقدرة على ضبط النفس والتعامل مع المواقف السلبية في أثناء الدوام ..إلخ.. وانت اكيد ما عاوز كدا لأنك كاتب فيCV* انك رجل المهام الصعبة والبطل المغوار ..فا شكلك ما لطيف لو زعلت أو كسرت التلفون أو بكيت مثلا .. احنا في الشغل يا سيد !!

طيب هل تفتكر حنسيبك كدا ؟؟ أكيد لأ ..تعمل شنوووو ؟

● في حالة الضيق والغضب :
☆ابتعد تماما عن المصدر :
اعتبرو تمثال وشيل روحك وامشي..هو يمكن يتخلع مثلا أو يكورك زيادة أو يسكت ويمشي هو زاتو ( ودا الهدف) ، كدا انت بتكون حققت أهم حاجتين وهم أنك وقفت الموقف ومنعتوا من التفاقم ..ووريت الشخص القدامك دا إنك أعقل وأوعى من انك تدخل في جدل بيظنطي  ما حيحل أزمة.
☆توقف عن العمل لمدة دقائق:  أهدا كدا وروّق مافي شي بيستاهل.. أسوأ حاجة حتحصل من موقف سالب في العمل هي شنو ؟ حتسيب الشغل ؟ طيب يعني مافي شغل غيرو؟؟ تعال شوف قسم الوظائف في السوق ..حاجة كدا ما تخلص!
☆مارس تمارين التنفس البطيء لدقائق :
ودي واحدة من التقنيات اللي إحنا بنطنشها في السودان.. أنا ما عارفة ليه بس أصلا الشعب السوداني عندو نفحة بتاعة طناش كدا !!
التنفس البطيء دا أفضل وسيلة لتهدئة النفس في حالات الغضب والحزن والتوتر وحتى الخوف ..خلوا الطناش !
☆فكر في الموضوع بعد ما تهدأ تماما :
دي الفترة اللي بيكون فيها الذهن صافي والتفكير بيكون منطقي وسليم ..وخبيث في حالات ..لكن لا بأس من الخبث النظيف والذكي  لانه مهم في الشغل في حالات معينة .. في حالات شنو؟؟ معينة !!  
☆في حالة الغضب اتخيل شكلك وانت غضبان :
أشنى نوع !!!! شناةٌٌ مُرّةٌ توقف من تواجد الخمائر الغذائية في رف المعلبات.. قادرين تتخيلو معاي؟

☆حاول التفكير في حلول للموقف  وعرضها على من يهمه الأمر :
دي لحظة التميز اللي ممكن تغير بيها قدرك ..لمن تمشي لمديرك أو زميلك اللي زعلك قبل شوية بحلول ذكية للمشكلة ،يا بقيت مدير مديرك ..يا فضلت زي ما انت.. موظف مسالم ،مائي، خافت ،تشبة الصبارة اللي على مكتب نهلة زميلتك. برضو ما كعب أخير من ما تاخد انذار بعدم التعرض مثلا !!

●في حالة الحزن :
☆ما تمشي الشغل!
لو مشيت حتنكد على أمة لا إله إلا الله ..انت قايل الناس دي ناقصين نكد؟ والله لأ!!
☆اذا صعب الغياب من الشغل ،حاول تاخد فترات راحة تكون فيها لوحدك .. فكر بهدوء أو حتى لو عاوز تعمل "ميني عزا " في المطبخ ما مشكلة .. بس بعيد من الناس الله لا يسوءك !!

☆ اتذكر انو الحزن والبكاء وحتى سرعة الغضب والضيق الظاهر هي فرص بيغتنمها الأخرين (ناس نهلة وفخري )  للتخلص منك أو لأذيتك من أجل استفادة شخصية :
يعني انت اللي بتدي فرصة للناس تستغلك وتزعلك وتصعد على أكتافك .. فما ما تزعل لمن دا يحصل اوكي؟


ولو عاوز مدير ممتاز ما يضيع تعبك مجهودك ويديك اجازة لمن تكون حزين ؛ جرب تفتش علي شغل في قسم الوظائف على موقع السوق و كمان عشانكم متوفر الان تحميل السيرة الذاتية و بنساعدك انك تعملها بطريقة محترفه و مجاااناً حتلقي الخانة واضحة في كل صفحات الموقع علي شكل مستطيل احمر اضغط علية و ظبط CV*.
حااااااجة كدا ما تخلص