الرئيسية المدونة

أسعار إيجار الشقق في موقع السوق

المشاهدات 1644


بتفتش علي شقة للإيجار؟ ما عارف تختارها كيف؟ ووين؟ معناتا أنت جيت للمدونة الصاح. في موقع السوق ح نوريك حاجات بسيطة تعرف تختار بيها الشقة المناسبة للإيجار، وكمان ح نوريك اّخر أسعار الشقق المعروضة العندنا في محليات العاصمة الثلاث. موش قلتا ليك أنت في المكان الصاح.

أختيار الشقة المناسبة عملية صعبة ومرهقة وبتحدد عليها مستقبل أسرتك لقدام بالأخص لو عندك أطفال ولازم تختار ليهم حتة اّمنة وقريبة من محل أقامتك. ومن هنا ح نبدأ نوريك الأمتيازات المفروض تتوفر في الشقة من عدة نواحي.

1- الشقة المطلة علي الشارع سلاح ذو حدين بالأخص لو كان شارع عام يعني ممكن ما تنعم بالهدوء فيها بسبب صفارات العربات وحركة المرور.

2- لقيت شقة واقعة بين شقتين بالنسبة ليك ح تكون ممتازة والسعر أقل لكن ح تتعبك من حيث منافذ الهواء الشبه معدومة، وتخيل ح يكون حالك كيف لو قطعت ليك الكهرباء ومافي مولد قوي في العمارة الح تأجر فيها.




3- شقة أرضية ح تكون ممتازة من ناحية الخصوصية وعدم متابعة الجيران ليك في الدخلة والطلعة، وأقرب للعيلة بالاخص أذا كان فيها شخص كبير وحركته محدودة.

4- الشقة الفي الأدوار الفوق برضو ممتازة من ناحية الخصوصية بس المشكلة لو تعطل المصعد أو قطعت الكهرباء، هنا ح تندم علي أختيارك.

باقي الحاجات المفروض توفرها في الشقق أو العمارة كلنا ملمين بيها من توفر الخدمات، المساحة البتختلف حسب أحتياجك ليها وزي ما قلت ليك خت أنها شقة مستقبل بالاخص للمقبلين علي الزواج، لازم تكون في عمارة مؤسسة كويس وبتم عمل صيانات دورية فيها، وأخيراً تكلفة الأيجار ودي ح يساعدك في معرفتها موقع السوق .

مناطق الخرطوم بالذات أحياء المعمورة، المنشية، الرياض والازهري حركة الأيجارات فيها كبيرة ومعظم المعروض في موقع السوق لشقق مفروشة غرفتين وتتراوح أسعارها بين 5.000 جنيه لغاية 10.000 جنيه في الشهر. والشقق الغير مفروشة والاستديو تتراوح أسعارها بين 3.500 جنيه و5.500 جنيه في الشهر.


منطقة أمدرمان الطلب علي الأيجار فيها كبير لرخصة الأيجارات غالباً، حيث يتراوح أيجار الشقة 3 غرف و منافع غير مفروشة بين 3.000 جنيه ل 5.000 جنيه.

منظقة بحري الاسعار فيها ثابتة نسبياً وبتعتمد علي المنطقة والحي كمان، والايجارات تكون بمتوسط 4.000 جنيه ل 6.500 جنيه. وبالنسبة لمنطقة شرق النيل تتراوح أسعار الشقة المفروشة من 4.000 جنيه ل 6.000 جنيه. وغير المفروشة بين 3.000 جنيه ل 4.500 جنيه.

وبكدا بنكون سهلنا عليك صديق المدونة عملية البحث عن أفضل أسعار الشقق وكيفية الأختيار في موقع السوق . وما عليك ألا تصفح مدونتنا من فترة للتانية وح تعرف الجديد في الأسعار ومعلومات تانية أكيد ح تفيدك.


 انتوا كمان ورونا اسعار الشقق حولكم و بتختاروها علي اي اساس..  

التعليقات

تصفح من خلال التطبيق

متاح الان على متجر التطبيقات