ارقي التياب السودانية


الثوب السوداني زي ما عارفين هو الزي القومي لكل ست في السودان وخارجه، ودا بقي علامتنا التجارية مع الجلابية والعمة بالنسبة للعزيز اّدم خارج أرض الوطن. في الدارجي الثوب السوداني بيطلق عليه لفظ (التوب) ومهما السنين مرّت بيفضل أجمل زي بتفضله حواء السودانية برغم تطور التصاميم بتاعته وأنواعه وأشكاله وزي ما غني أبوعركي " شفتا التوب وما لاقاني أجمل منو، شفت التوب وسيد التوب يكون كيفنو".

التُوب يستخدم للتميز بين المراة المتزوجة وغير المتزوجة،  وغرض تاني من لبسه عبر الزمان كنوع من من باب السِتر والاحتشام. مع مرور الزمن بقي  تقليداً ورمزا للمرأة السودانية يعبر عن أناقتها ويعطي مؤشراً عن وضعها الاجتماعي والمادي. ودا بيظهر في تنوع خاماته وأشكاله إلى حد كبير بالاخص في الآونة الاخيرة.

تاريخ التُوب السوداني بيعود للحضارة البجراوية، وكان الزي الرسمي للكنداكات،  وأول ماظهر من ثياب سودانية في السابق ثياب (القَنجَة، والزَرَاق، الطرقة والفَرْدَة)، وديل مصنوعات من القطن السوداني. وبعدها ثياب (الكِرِب) السادة ويمتاز هذا النوع من الثياب بلونه الأسود الناعم نسبياً وكان تقتنيه المترفات من النساء.


تياب رهيبة علي موقع السوق السودان


 أنواع التُوب السوداني الموجودة في السوق السوداني وبرضو المعروضة علي موقع السوق بيظهر الأختلاف الواضح في خاماتها وأنواعها من تياب التوتل ، لتياب السهرة، للفرد الكسلاوية والتياب الهندية. تياب التوتل هي أكتر خامة منتشرة ومفضلة من حواء السودانية سواء كانت سادة أو مشجرة أو مطبوع عليها بالبوهية وتمتيز الخامة دي ببرودتها وملائمتها لأجواء السودان الحارة وهي أنواع (تياب سويسري، تياب الماني، تياب ايطالي، تياب امازون، راتي،تياب  منديل ،تياب موهوب، البشرى و بعض الاسامي الخاصة بتاجرات التياب).  وتتراوح أسعاره:
700 جنيه ل 1200 جنيه للسويسري
 الديجتيل و امازون بين 400 جنيه  ل 1300
الايطالي 300 الي 1600
الماني 400 الي 850
منديل 270 الي 550
موهوب 380 الي 480
 أما سويسري  البشري ب 850 جنيه

الأنواع التانية من التياب السودانية هي تياب السهرة ودي كمان أنواع زي ( لامي، جوبير، دانتيل، تل، و الحرير المشغول بالبهية ـأو الاحجار و الترتر أوأحجار السواروفسكي). والخامات المصنوعة منها التياب دي عادةَ بتكون من الحرير، الشفون، التُل والجبير وبيتم العمل علي تطريزها حسب رغبة الزبونة. ودي أسعارها بتتراوح في تياب الحرير حسب مساحة التطريز في التُوب  والمواد المستخدمة


 وبتبدأ من 140 جنيه لغاية 1300 جنيه وأكتر أذا كان التطريز بالاحجار السواروفسكي.وتتراوح الاسعار من 150 جنيه ل 1500 جنيه عبايات الشفونات أو السادة المُطرزة. أما التياب الهندية فدي بتبدأ من 170 جنيه – 3500 جنيه اّخر نوع تياب هي الفَرْدَة الكسلاوية وبتتلبس في مناسبات مختلفة أو كنوع للزيارات العائلية وهو كمان أشكال وأنواع وعادة بيكون سعرها بين 200 جنيه ل 850 جنيه.

ورغم التنوع الكبير في أشكاله وخاماته عبر الزمان إلا أن التُوب حافظ على نمطيته ولم يندثر وواجه الثقافات الدخيلة مثل العباءة الخليجية بصمود كبير، فهو يحظى بحب النساء السودانيات لسحره وجماله وامكانية التجديد فيه بالألوان والرسم والتطريز ليواكب الموضه والعصر.

و انتي كمان اذا بتشتغلي تياب او عندك اي تجربه سمحة يا ريت تشاركينا بيها في التعليقات خصوصاً كيف انتي بتهتمي بنظافة توبك و غسيلة :)

التعليقات



تسجيل الدخول