انهيت دراستك ! الجاي شنو؟

The Panle :

  هو منصة توعوية مختصة بكل ما هو متعلق بالمال والاعمال (للتوضيح..ما يجلب ويوفر المال ..وما يساعد على ايجاد الاعمال)  سيناقش جميع المحاور المتعلقة بالوظائف ، طرق ايجاد العمل المناسب ، التطوير الذاتي ، رفع الانتاجية وما الى ذلك من ما يخص شريحة الشباب الموظف, والباحث عن العمل على حد سواء .. سنستضيف من يفيدنا وجوده على هذه المنصة من أجل المنفعة العامة،كما سننوه الى الوظائف المتوفرة و المعلن عنها في سوق.كوم وسنجاوب على جميع تساؤلاتكم في هذا المجال.

** واتخرجنا .. واخترنا اغاني لي زفة التخريج ..ورمينا الطواقي في الهوا ..وبعدين ؟؟

  دي واحدة من اللحظات الصعبة جدا في حياة اي شخص وصل مفترق الطرق دا .."الحياة العملية

الحياة العملية ما صعبة ومخيفة زي ما بيتهيئ لينا من معاناة الأخرين.. ولازم نعرف انو السعادة والراحة في الحياة بعد التخرج قرار أكتر من حظ .

First things first:

# حدد وظيفة حياتك اللي ما بتتخيل نفسك الا فيها .. وفتش عليها .. اسعى ليها زي سعيك لانك تبرمج مع اصحابك بوم الخميس .. من غير ما تخلي الصعوبات تحبطك لانه في الأول وفي الأخر دا حلمك.

# اذا ما لقيت وظائف شاغرة في مجالك ما مشكلة .. اشتغل الحاجة البتقدر تعملا لفترة مؤقتة لغاية ما تشتغل الحاجة اللي بتحبها. بمعنى , استخدم مقدراتك الخاصة  للحصول على وظيفة ما بشكل مؤقت الى ان تجد وظيفة في مجالك .  

(Love what you do so you can do what you love)

#يعني شنو احب الحاجة البشتغلا؟

يعني تتأقلم معاها وتتعامل معاها كأنك بتحبها , حتلاقي روحك حبيتها تلقائيا..

وخلال الفترة دي ذكر نفسك دائما انو وجودك في المكان دا مؤقت ، وانو دا عشان توصل لأهدافك لانه مافي حلاوة من غير نار  

# حتلاقي ناس في وظيفتك المؤقتة دي كارهين مكانهم وبيشتغلو من غير نفس ومعترضين على اي شي وكل شي ..ابعد عنهم ..ابعد تماما انت ما محتاج لأي اشخاص سلبيين  في المرحلة دي..

واستمتع بي كل لحظة في المكان اللي انت فيهو واعتبروا كورس مدفوع القيمة ..حتتعلم منو حاجات قيمتها حتظهر ليك في الوقت المناسب.

(Comparison isn’t always good)

# المقارنة .. اياكم ثم اياكم تقارنو نفسكم بالاخرين

كل شخص فينا عندو وتيرة حياتية ماشي بيه مفصلة مخصوص عشان يتوائم مع حياتو هو

صاحبك اللي بيتخرج الليلة ويشتغل بكرة ويعمل قروش من اول سنة دا.. صاحبك ..ما انت .. رحلتو مختلفة تماما عنك .. نجاحو السريع ما دليل على انو افضل منك ابدا..

ركز على روحك .. لانه اللي انت شايفو نجاح الان ممكن يكون اقصى ما جيوصل ليهو غيرك ..وانت جاي عليك نجاح لا يقدر بمال ..بس مقدر بزمن .. بعمر ..بتعب انت حتتعبوا عشان توصل..

ما تقارن نفسك بأحد!!

# ممكن تقرا هندسة .. وتتخرج وتلاقي وظيفة كمشغل برامج في التلفزيون مثلا..  

ومع الزمن تكتشف انك مايل للاعلام اكتر من الهندسة لا وعندك مواهب كمخرج او منفذ ما كنت عارفا في نفسك.. دا ما فشل على فكرة ..بالعكس .. ال 30 سنة اللي بعد التخرج ديل اصلا مفروض يكونو رحلة اكتشاف للذات

تجرب فيها القريتو ..والهويتو ..دا ما معناتو انو سنين الجامعة داحت هباءا منثورا ..ابدا ..لانه "المخرج المهندس" سعرو اكيد اعلى!!

 ..

Take risks 

المغامرة في اول سنين بعد التخرج مهمة جدا .. لانه بنتعلم منها كتير..

عاوز تاخد كورسات ماليها علاقة بمجالك

. حابب تسافر خارج او داخل السودان لمدة سنة وتشوف اماكن جديدة وحضارات مختلفة ؟ عايز تتطوع في جمعية غير ربحية لفترة من حياتك؟ ؟

اسوا شي حيحصل شنو ؟ انو عمرك بقى 23 سنة ؟ لسة عندك 29 سنة تنجز وتوصل

في ناس حيقولو لي طيب احنا اتخرجنا بضغوطات كبيرة على أهالينا وعايزين نشتغل عشان نساعدهم.. طيب دا حيرجعني للكلام السابق ذكرو.. اشتغل اي شي .. ما ضروري في مجالك اذا ما لقيت .. اشتغل اي شي ،وحبو، واتعلم منو.. لانه مافي وظيفة ما مفيدة .. وعندك 20 سنة تساعد اهلك وتكون نفسك, وبعد ما ترد الجميل تسافر لو عاوز وتتطوع لو عاوز!! ..

الأحلام ما عندها زمن معين أو عمر معين .. ما بيفرق حققتها متين طول ما هي اتحققت !

How to apply for a job

#طرق البحث كثيرة جدا

اولها السؤال... اسأل اي حد بتعرفو شغال في شركة او مستشفى .. السؤال ما عيب ابدا لانه اللي انت بتسألوا دا غالبا حيكون لقى وظيفتو الحالية بعد سؤال .

من الطرق الأخرى  المتاحة للبحث عن وظائف هي الانترنت , الكثير من الاعلانات عن الوظائف على بعد كبسة زر وبالتحديد موقع السوق.كوم موقع يسهل الوصول اليه والتعامل معه , وهو في متناول الأيدي ومنظم بطريقة بسيطة جدا لتجد وظيفة أو حتى لتعلن عن نفسك كمؤهل للبحث عن عمل .

الاصرار والاستمرارية في المجاولة مهم جدا .. يعني ما ممكن تقدم على 4 وظاىف الليلة ..ولو مافي حد رد عليك او اتصل بيك معناه

 الحياة وقفت والحظ سيء.. المفروض انك تقدم في 10 و 20 وظيفة كل يوم لغاية ما يتصل بيك ذلك الشخص المعني بتغيير حياتك للأفضل  قدم 9 شهور ان لزم الأمر .. لانه نصيبك يمكن يجيك في الشهر العاشر !!

العلم ما بيقيف في الجامعة ..اي يوم انت بتمشي فيهو الصباح لوظيفة انت ما حابيها او مافي مجالك هو يوم تعليمي .. بتتعلم و بتصقل فيهو:

Social skills,

Communication skills

Character fine tuning

Trouble shooting.

ناهيك عن العلاقات اللانهائية واللي ما بتوفرها ليك المرحلة الجامعية

#لو ما لقيت وظيفة ثابتة ..وكل الوظايف الموجودة مؤقتة او تدريبية .. ما تفوت الفرصة دي 

اخد الوظيفة المؤقة واعتبرا فرصة تعرف بيها مقدراتك.. واتعرف على مجال العمل .. المعاملات العامةو طرق التعاطي مع العملاء الخ

دي وحدة من الحاجات اللي بتخلي فرصك لانك تقبل في وظيفة دائمة أكبر بكثير

Any job is better than no job...

مافي وظيفة بسيطة ..اي وظيفة بتعلمك وأخيرا ...

في ناس بتتعامل مع بعض الوظاىف على انها قليلة وغير متناسبة مع درجاتهم العلمية .

اي وظيفة خلقت لانها مهمة في حياتك قبل حياة الشخص الشغال فيها

ما عيب انك تبدى صغير ..طول ما طموحك انك تكبر .. وكل الشخصيات العامة اللي بالنسبة ليك  "مثل أعلى" بدو بوظائف صغيرة وما اتعاملو مع الموضوع على انو تقليل من قيمتهم او بيؤثر على منظرم العام

السبب الوحيد اللي ممكن يخليك ترفض وظيفة هو انك تكون غير قادر على ان تأديها بجدارة . غير كدا ..اشتغل المتوفر

وخلي في بالك انه اي شي بتشتغلو حيعلمك درس قيم يفيدك في يوم ما

للتعرف على باب للوظائف اضغط هنا