التطوير الداخلي في الشركات

موضوعنا الليلة بيخص التدريبات والكورسات الداخلية في الشركات ، واللي في العادة المفروض يوفرها صاحب الشركة أو القائم عليها لموظفينه بهدف تطوير الشركة والموظف .. لكن اهمال العادة الجيدة دي في سوق العمل السوداني أصبح هو العادة !!  واتحولت التدريبات الداخلية من بند ذو "أهمية" ل "رفاهية".

ما هي التدريبات الداخلية :

هي الكورسات اللي  بتقدمها الشركة " على حسابها" لموظفيها ( ركزوا في على حسابها دي! )  من  ورش عمل ، دروس ، تدريبات نظرية وعملية وغيرها ..

 عادة بتكون في نفس مجال الموظفين ولكن بصورة مركزة ومتطورة ، زي لبن الجاموس كدا ! والهدف الأساسي منها هو التطوير بشكل عام ، ودا يشمل الشركة والموظفين بنفس المقدار.

فوائد الدورات الداخلية في الشركات :

# أول شي حتكون( كصاحب عمل ) مدار حديث المدينة ، لانه في زمن ندر فيهو الاهتمام بالتطوير الداخلي ندرة "الكولا فانيليا" ..اهتمامك بالموضوع حيخليك تكون بالنسبة للشركات الأخرى كمن (جاب العيد)!

#حتضمن ولاء الموظفين ليك ، لانه انت من الأخر كدا مدلعهم ..ومهتم بصورة شخصية بحياتهم وتطورهم الذاتي ، فا حيفكروا مية مرة قبل ما يسيبوك ويمشوا لي حد تاني .

وحيفكروا ألف مرة قبل ما يهملوا في شغلهم ويخسروا مكانهم عندك.

#موظفينك "حيقشروا" بيك تماما في الأوساط الاجتماعية ،نوع (احنا شركتنا كل كم شهر بتعملنا كورسات بالشيء الفوولااني ).. وهكذا .

#الشركات التانية حتحولك من شركة عادية خارج الرادار ،لمنافسة قوية و نِد ليهم ..  شوف دا حيرفع سعرك ومكانك في السوق كيف !

#الفوق دا كله ونسة شركات ساي ... أهم نقطة هي إنه شركتك فعليا وفيزيائيا (حتتطور ) !!

 بدل ما شركتك  مكونة من طابق واحد حيمتدوا ل 5 طوابق ،وبدل ما يكون عندك فرع واحد بس حتكون مالك لي فروع كتار..

يعني اتخيل مثلا  راعي يجيب بقرة واحدة مثلا و يصرف عليها وتصرف عليهو وما يجيب غيرها باعتبار إنها مؤدية أغراضها ...لغاية ما فترة حياتها تنتهي مرة واحدة ويرجع صفر اليدين  عادي..أكيد انتوا ما عايزين كدا!

كورسات التطوير ما بالضرورة تكون كلها سفر وصرف قروش وخلاص ،،، في حاجة إسمها (سينيور )موظف ، يسافر برة ياخد الكورس التدريبي  ويجي يعلم (الجونيور) موظفين كلهم بسعر سفر شخص واحد،  في كورسات مجانية أونلاين .. في أساتذة ومدرببن سودانيين أسعارهم حنينة جدا ، في خيارات كتيرة بس انتو قولو عوك .. وفي إعلانات عن  كورسات فيهنا في الموقع... يعني اصلو ما حتتعبوا في الموضوع .. بس خلوا نصب عينكم انو الهدف المتجهين عليهو حيعوضكم أضعاف المال و المجهود  اللي انصرف على كورس تدريبي واحد.

اذا كنت مدرب او مركز تدريب اعلن يا زول
و اذا كنت بتفتش علي دورات تدريبية للكبار حتلقاها كلها هنا