نسافر برة ؟ ولا نعمر جوة؟

السؤال المعضلة ..السؤال اللي بيسبب أرق ل 90% من الشعب السوداني .. السؤال اللي مافي ليهو إجابة لأنه أقرب لسؤال وجودي :

أسافر برة عشان أكون مستقبلي ؟ ولا أقعد مع أهلي عشان ما أسيبهم لوحدهم ؟؟؟

يعني جد الواحد محتار !!

تسافر ؟ أهلك يحتاجو ليك ما يلقوك ،أخوانك يكبروا ويتخرجوا ويعرسوا وانت ما تحضرهم ، وذكرياتك تفوتك .. ويتحولوا من جزء كبير من يومك لي ذكرى بعيدة بتحاول تتناساها عشان ما توجعك ..

تقعد ؟؟  مستقبلك العلمي والمهني والاجتماعي أهو دا ..شايفو؟ أهو دا نازل في المجارير ، عليك الله "عاين ليو "!

 ولو أهلك معتمدين عليك لتحسين ظروف المعيشة دا كمان موضوع تاااااني ...تاني الليل ما بتنومو ..تسهر تعد نجوموا زي الشاطر !!

المشكلة دي مرتبطة تماما بظروف البلد ، لانه لو الأوضاع المعيشية مناسبة والتعليم متطور ما بتضطر انك تمشي أي مكان ، إلا لو حبيت تتفسح ، فا أول شي تعملو إنك ما تلوم نفسك ، وكونك بتفكر في الموضوع أصلا وبتخليهو يشغلك فا دا أكبر دليل إنك مهتم ومتحمل المسؤولية وبتحاول بس ما عارف تبدأ من وين .

طيب الحل ياخواننا!!

الحل بسيط ... لانه مافي اجابة صحيحة للسؤال دا ..الإجابة بتعتمد عليك انت ..

حتقدر تكون بعيد منهم من غير ما تتأثر نفسيا ؟  وهم ما حيتأثروا شديد من غيابك ؟ يبقى تسافر .

حتحس بالذنب إنك سايبهم وراك ؟ وحتحس بالوحدة من غيرهم ..يبقى تقعد وتشترى نفسك وراحة بالك .

لانه القلق ليهم والوحدة ليك أمراض قاتلة ..قاتلة !!!

ولو قررت تقعد فاالحلول كتيرة على فكرة..

في ناس في أوروبا الباردة ديك .. دايرين يسافروا وبرضو ما قادرين يسيبوا أهلهم ..عارف عملوا شنو ؟ قعدوا مع نفوسهم في لحظة صفاء و (هوت شوكوليت) كدا ، وفكروا كيف يزيدوا الدخل المادي ويتطوروا من غير ما يضطروا يبعدوا ، كتبوا مقدراتهم اللي ممكن تباع كخدمة  في قائمة ، واختاروا أكتر واحدة مرغوبة في السوق، وممكن تنجز (من منازلهم)، عملوا حسابات بأسعار رمزية  في الخمسمية مليون موقع مجاني على الانترنت وبدأو يبيعوا خدماتهم لناس برة المدار بالنسبة ليهم .. لي السودان عندهم فيهو زباين !

ولمن حبو يطوروا نفسهم ما غلبهم يقعدوا ساعة زمن يلقو فيها كورسات مجانية أو ما غالية أونلاين وبتدي شهادات ... الكلام دا  كلو انت ممكن تحققوا من طاولة مكتبك.

السوق.كوم واحد من المواقع اللي بيوفر ليكم الفرصة الكاملة لعرض خدماتكم ومتابعتة عملاءكم أول بأول لأنه سهل الاستخدام ليكم  وكمان للعميل .. أهو شفتوا ما مقصرة معاكم أظن ! 

شدو الحيل .. واختاروا صح ..والمستقبل في ايدكم تحددوهوا ..بس اتذكروا إنو القروش ما بتعوض الأهل عن غيابكم مهما كان..

و ما تنسوا حملوا السيرة الذاتية ( مستطيل احمر في اعلي كل صفحة ) و خلوا اكبر عدد من الشركات توصل ليكم عبر السوق ..