الرئيسية المدونة

فن الديكوباج في السودان

المشاهدات 3706

الليلة ح نتكلم عن موضوع ليه علاقة بتجديد مستلزمات المنزل من أثاث لأواني أو حتي لوحات وتحف بأستخدام فن أنتشر منذ ألالاف السنين وهو فن الديكوباج. و في الاونة الاخيرة انتشر فن الديكوباج في السودان عبر الورش التدريبية و الفيديوهات التعليمية البتقدمها بعض المصممات السودانيات و اصبح مصدر دخل لعدد من النساء بعد تطبيقهم ليه في الاثاث و ادوات المطبخ و المنزل. ويعرف فن الديكوباج أو فن التزيين بالفرنسية (Découpage)بأنه فن أستخدام الورق القديم لعمل لوحات فنية. أول أكتشاف للفن دا ظهر في مقبرة بشرق صربيا، لكن يعود أصله للصين في القرن الثاني عشرحيث كانت قطع الورق تزين الفوانيس و النوافذ و الصناديق و غيرها. في القرنين السابع عشر والثامن عشر أنتقل الفن دا لفرنسا، أشتهر فن الديكوباج بأنه فن الإنسان الفقير لأنه ما كانت عندهم القدرة المادية لتجديد أثاث منزلهم فقاموا بوضع قصاصات عليه وبعدين بدهنوها بالورنيش علشان يتحصلوا عليأثاث بشكل .



يتميز فن الديكوباج بأنه فن سهل رائع، ممكن باستخدام خامات بسيطة وقديمة الحصول على لوحات فنية جميلة أوالحصول على قطعة أثاث بمظهر جديد زي الفازات او المزهريات، ادوات التقديم، والأطباق الخزفية و حتي الثلاجة و الغسالة و غيرهم ممكن يتزينوا بالديكوباج. ويمكن تطبيق فن الديكوباج على أسطح كثيرة مختلفة مثل الخشب، الكرتون، المعدن أو الفخار.

يشتهر فن الديكوباج بثلاث أنواع :

  • الديكوباج المكون من القصاصات: التي يتم لصقها على الصور أو الأثاث لمحاكاة لوح أخرى .
  • المونتاج: ويقصد به تنسيق صور، ملفات، طوابع بريدية أو اعلانات لصنع عمل فني ، والتي يمكن وضعها على الجداريات، أو على براويز ثم تليمعها بالورنيش .
  • الكولاج: ويقصد به دمج عدة قطع من أي خامات مثل القطع الخشبية ، أو الأصداف  أو التذكارات بترتيب معين حسب ذوق الفنان لإخراج لوحة فنية قد تتجسد على صندوق خشبي ويزين بالصدف أو الأحجار الكريمة والخيوط .

لفن الديكوباج أدوات للعمل بيه علشان تساعد علي أن العمل يكون متقن وزي ما قلنا هي خامات بسيطة وبتكون متوفرة بأسعار رخيصة و اغلبها متوفر في السودان في المكتبات الكبيره و كمان معروض جزء منها هنا في الموقع زي:

•       فرشاة ناعمة

•       أسفنجة يستحسن ان تكون قديمة لتثبيت ورق الديكوباج علي الغراء

•       الوان أكريليك ومادة الجيسو

•       الغراء الخاص بالديكوباج او غراء أبيض عادي

•       ورنيش عادي بدون لون

•       مناديل ورقيه ملونة أو صور من المجلات او مطبوعة بالليزر ولازم تكون رقيقة

•       مقص صغير وحاد زي مقص الاظافر او التطريز

•       صنفرة ناعمة لنظافة السطح العايزين نطبق فيه فن الديكوباج

•       السطح المراد التطبيق عليه سواء كان فخار، خشب، بلاستيك او زجاج

خطوات العمل كالتالي:

لو حابين نطبق فن الديكوباج علي سطح خشبي مثلاً بأستعمال مناديل الديكوباج الورقية، نبدأ بتجهيز الخشب اذا ما أملس بنصنفرته بصنفرة ناعمة لمن يبقي أملس وبعديها بتم دهنه بطبقة من الجيسو او البوماستك الاميلشن إذا لم يكن لون الخشب أبيض أو ألوان الاكليريك مخلوطة مع مقدار من بدرة الأطفال وحبة غراء ولون أبيض (المادة دي بسميها مادة سُندس) هي ماده متعارف عليها بس انا بسميها كده لأنه وصلتنا ليها فنانة سودانية اسمها/ سندس صديق ليها خبرة في فن الديكوباج وشاركت مكوناتها مع محبين الفن دا.  لمن ينشف الاساس بتاع الجيسو أو مادة سُندس نبدأ نثبت المناديل بعد قص أطرافها بالمقص لتحديد الشكل بتاع الرسمة بعد مسحها بغراء الديكوباج من تحت ومن فوق ونشيل الزائد بأسفنجة ولمن تنشف نديها طبقة من الورنيش.

دي طريقة تطبيق الديكوباج علي أي سطح بصورة عامة والمكونات البنحتاج ليها وأكيد ح نتناول الطرق المختلفة لتطبيقه علي أسطح تانية وبخامات تانية غير المناديل المخصصة ليه. للوقت داك أتفرجوا علي المواده المتوفرة لتطبيق فن الديكوباج و كمان عروض لمستلزمات منزل معموله بفن الديكوباج.

انت كمان ممكن تتعلم فن الديكوباج و تبدأ/ي مشروعك الخاص في صنع الاثاث و مستلزمات المنزل و اذا كان عندك اي افكار او اثاث للبيع ما عليك الا انك تشاركنا بيه و تعلنة عبر الموقع او التطبيق.

التعليقات

تصفح من خلال التطبيق

متاح الان على متجر التطبيقات