خطط سنتك صاح يازول

اخر حاجة بنتحمس ليها في أخر كل سنة هي اتخاذ قرارات مصيرية من  فيما يخص حياتنيا اليومية ،عاداتنا السيئة ، علاقاتنا مع الأخرين أو  حتى تبني نظم غذائية وصحية .. على أمل أن تهب رياح التغيير على حياتنا وتبقى أفضل في السنة الجديدة ...

وأول حاجة بتحصل فعليا في بداية السنة الجديدة  هي التكاسل،أو تخفيف عدد و مدى شدة عناصر قائمة التغيير ..أو حتى نسيانها تماما ... قصة مؤثرة !!

طيب السنين الراحت دي راحت خلاص ..مافي حل ترجع ونغير ..بس السنين الجاية دي ممكن يتعمل فيها كل الفات وأكتر ..لو الشخص قرر "يحددها مع نفسه " ..

تحدي النفس بيحمس الانسان أنو يؤدي أي مطلب أو مهمة قدامه بهمة كبيرة مهما كانت المهمة صغيرة ..

اتحدى نفسك ..قول أنا السنة دي حاعمل 3 اشياء من قائمة التغيير في ظرف تلاتة شهور ..وإذا ما أنجزت في الوقت المحدد حتزيد المهام المفروض اعملها في زمن أقل ..وهكذا ..

اذا ملاحظين إنو ما ذكرت أي مكافأت أو تحفيز  إذا انجزت المطلوب في زمنو ،لانه انجازك لحلمك في حد ذاتو مكافأة..

أرح نحاول ما نأفور ...نبدا بالتغييرات الصغيرة في حياتنا .. لانه تنفيذها ساهل وشبه مضمون لو مليت روحك عزيمة ، والنجاح فيها بيحفزك أكتر للخطوة البعدها ..

الأولوية بتكون للعادات اللي بتأثر على الأخرين سلبا .. لانه الناس ماليها ذنب لو انت صوتك عالي في الكلام  أو غير مرتب  في مقتنياتك الخاصة مثلا.. عيب زاتو زول كبير وواعي وغرفتك زي سوق أم سويقا!!!

"ممارسة الرياضة  " هي في الغالب أكتر نصيحة الناس بتسمعا في أي محفل .. لكن الحق ما بيزعل... طول ما انت كسول كدا اليوم كلو نايم أو متكل قدام التلفزيون أو معتبر السواقة دي رياضة حتفضل ساكن في السنة الفاتت !! لا رياح تغيير حتهب ولا يحزنون.. ا

الرياضة  بتأثر على دماغك" النايم ديمة" تأثير كيميائي عديل وحتشيل خلايا الكسل من جسمك بصورة شبه نهائية.. يعني كتتحول تلقائيا لكائن جديد مفعم بالحديد ... أها في أحسن من كدا ؟

بعد ما تحس أنك بديت تنجز بعض من التغييرات والحماس بقى ماليك ، تجي للخطوة المهمة جدا واللي بتضمن تغيير أشمل وأعم على مستواك المعيشي والمهني والشخصي ...

قائمة التغيير الخاصة بالحياة المهنية ، من أقل القوائم التي تحظى بالاهتمام ... قصة مؤثرة برضو لكن كلو ملحوق ...

حاقترح بعض من الأفكار البسيطة ذات الأثر الكبير على النفس ، ومستوى الأداء في العمل ، لو الواحد التزم بيها حيلاقي تغيير جذري وفوري :

● جدد ثقتك في نفسك ..البس ألوان  جريئة في حدود الأناقة طبعا ..لتترك أثر ايجابي في نفس المحيطين اللي حيثقوا فيك لمجرد إنك واثق في نفسك رغم انو قميصك برتقالي فاقع مثلا !! 

● غير مشيتك ... المشية المحنية عندها ضرر نفسي كبير غير ضررها الصحي ... فا ليه ماشي محني ؟ انت احسن نسخة منك في الكوكب.. فا حقو تمشي على الأساس دا.

●  اشتري دماغك : ما تخلي أي حد يخليك تصرف طاقة عليهو ... ما تنفعل مهما كان الموضوع ... مش الشغل دا ؟ كبيرو حتمشي تشوف غيرو ..ورزقك كدا كدا حيجيك ..

برد دمك قدر الامكان ..ادرس الأمور والمواقف بهدوء عشان تتصرف صح.. لو أي سوداني عمل الخطوة دي بس ، كنا حنبقى مشهورين عالميا" بالشعب السعيد"

●أقرا يا زول... أقرا أي شي أن شالله ما وراء الطبيعة !!  القراية بتعدل المزاج، بتزيد الحصيلة اللغوية والمعرفية ،بتزيد الثقة بالنفس، بتزيد خبرتك في شغلك وتميزك عن الأخرين، وبالتالي بتزيد فرصك في الصعود إلى مراحل متطورة في عملك ..ووأكيد دخلك برااهو حيزيد ..

دي زيادات ما هينة ودا اللي انت عاوزوا أصلا.... فا شنو ؟؟ أقرا سااي يا زول !

●أبقى موظف "عابر"..

يغني خليك في أحسن حالاتك الوظيفية ، أدي كل ما عندك واتميز في أداءك ، الخطوة دي بتضمن إنو رب العمل ما يقدر يتخلى عنك ، و دا بيديك الفرصة تطالب بزيادة في دخلك أو تحسين من وضعك المكتبي أو حتى تطلب تسهيلات من العمل عشان تصعّد من دراستك الأكاديمية... والإدارة ما بترفض طلب لموظف عابر زيك...خليك عابر !

 ● وأخيرا غير أصحابك أو زملائك لو حسيت إنك ما بتتطور للأحسن كشخص وكموظف، لأنه الصاحب ساحب.. وعلى دا الأساس صاحب ناس طموحين ، متجددين في أفكارهم ، ناجحين في حياتهم حتى ولو بشكل بسيط ، صاحب ديل ..وديلاك ما تقطع علاقتك بيهم بس ما ضروري الناس تتعطل كل يوم عند أميرة والحال هو الحال قبل الشاي وبعده ...

بعد  ما تتأكد إنك عملت العليك وزيادة ، لو لقيت انه شغلك دا ما حيوديك لقدام ، طوالي تفتش غيرو في السوق.كوم قسم الوظائف ، أكيد حتلاقي حاجة أفضل طول ما النية سليمة والقلب مليان عزيمة.

التفيير كلمة كبيرة فعلا... بس ما مستحيل تحقيقه ،بالذات إنه مفتاحه صغنون وقاعد عندك ... بس انت جرب  اتحدى نفسك ..ولو مكسل تجرب ما مشكلة أبدا.. ما حتخسر شي يعني.. حبة سنين من حياتك حيمرو زي القبلهم ؟ مستقبل مختلف وأنيق ؟ قروش كتبرة شدييييد؟ بيت وعربية وسفر وفسح وفرح؟ اي عادي ما تشغل روحك الدنيا فانية أصلا..

شاركنا افكارك في التغيير الايجابي و خلي الناس تستفيد من تجربتك المثمرة..

و ما تنسي انك تحمل سيرتك الذاتية الان من هنا عشان الشركات توصل ليك..